Reg’Art sus l’autre…tota una Istòria.
Pintura en Aubanha.
Coma cada annada a l’entorn de la Jornada dei Fremas, Reg’Art s’installa dau 4 au 20 de març ambé sei 80 artistas fremas vengudas de tota la region dins la fièra Capela dei Penitents Negres d’Aubanha !
Quand una causa es bòna per de que pas se’n inspirar ? Reg’Art a chausit de faire coma la mòstra « Picasso e lei Mèstres » que en 2009 donava de veire la confrontacion de la tela d’un pintre ancian amb aquela de Picasso.
Aquesta annada, leis artistas de Reg’Art van citar, faire referéncia, rendre omenatge, destornar, interpretar, copiar caduna un Mèstre ! Lo prepaus serà istoric ! Prendre per subjèct una òbra d’art, se laissar guidar per aqueu modèl.
L’artista dins sa recerca d’originalitat a la necessitat de se distinguir e per aquò li fa mestier una observacion indefugibla de çò que s’es fach avans. Que se norriguèsse d’influéncia, de destornament ò de copia, l’inspiracion nos pòrta vers l’avans. Anar de l’avans coma avans !
Serà de bòn veire aquela mòstra qu’es un rendètz-vos ara important de l’art dins la nòstra region Provença-eca….
Magalona Dargent-Bizot, Patricia Jouve e Magalí Bizot-Dargent mostraràn coma n’an la costuma una òbra de cultura e de lenga occitana.
Pèire François, pintre Occitan, qu’aviá dessenhat l’afficha de la primiera granda manifestacion per la lenga a Carcassona es lo Mèstre chausit per Magalona.
Magalí convida e occitanisa l’alemand Albrecht Dürer e Patricia s’inspira de Nicolas de Staël, pintre internacionau marcat per lei paisatges antibolencs onte s’acabèt sa vida.
Vernissatge lo divendres 4 de març a 18 oras 30. Dubèrtura dau 5 au 20 de març, dau dimars au dimenche de 10 a 12 oras e de 14 a 18 oras, Capela dei Penitents Nègres, Aires Sant-Miquèu en Aubanha.
Entresenhes : 04 42 18 17 17 ò 04 42 18 17 26 ò http://regart-aubagne-8mars.over-blog.com/
Magalí