Se lo siti de l’ieo-06 a pres un pauc de vacanças ben ameritadas, es pas estat ansin ambé la cronica « Nice-Matin » tenguda per l’IEO-06 dins l’edicion grassenca qu’a fach camin. Avèm decidit de publicar dins lei jorns a venir lei « RESSON D’AQUI » de l’estiu. Per començar vaquí un tèxt de Guiu Rami : Una taulejada ben agitada.
Vautres toi sòcis ò amics nos podetz escriure per prepausar lei vòstres tèxts.
Una taulejada ben agitada.
Lo monde si retròban volontiers a l’entorn d’una taula quora s’agisse de festejar un eveniment excepcionau. Ansin fuguèt per lo baptisme de la nòstra amiga Monica.
Lei sieus grands èran lei megiers d’una familha borgesa grassenca fòrt conoissuda : la familha Ossòla. Lei parents profichant de tota la plaça que li aviá sota un cubert alestissèron un grand repàs. Tot èra estat netejat : lei becuts, leis aissadas e toi lei ravans que si tròban dins una granja fuguèron esconduts darrier de lençòus ornats de flors que odoravan que non sai.
Ieu èri enca’ minòt, arribèri, vèrs tres oras de l’après-dinnar, ‘mé lei mieus gents e toi lei vesins per saborar lo dessèrt. Cadun si portava la cadiera. Lei convidats avián ben manjat – de raiòlas, segur – e begut que mai. Quauqueis-uns avián cargat la monina.
Lo grand de Monica, Jaufré, cantèt en piemontés. Acompanhava lei sieus cançons ‘mé doi culhierons, plaçats dins lo còl d’una botelha vueja que gangassava còntra la pòrta de l’estable que si trobava a quauquei mètres de la taulassa. E canta que cantaràs… Subran, Jaufré si metèt en tèsta de sortir la vaca per fin que participèsse a la fèsta. Elena, la sieu frema, li diguèt : “Jaufré, fagues pas lo fòl !” Mai, eu, aviá ja durbit la pòrta e anoncièt : “Vaicí Rosí !” De costuma, la vaca èra brava ; mai quora veguèt tot aquest monde, s’enrabièt, desquilhèt una taula, de sietas, de gòts s’esclapèron… un chaple ! Fuguèt un si sauve cu porrà generau ! Cadun bramèt e s’estremèt : cu lampèt lo mai luenh possible, cu montèt an una escala, cu si gitèt sota lei taulas…
Finala, doi ò tres òmes pron galhards agantèron la vaca per lei banas coma siguèsse un bòu, la dominèron e la tornèron dins l’estable.
Of ! d’aquela istòria. Monica, ela, se’n sovèn pas, mai pòdi dire que lo sieu baptisme demòra dins la memòria de toi lei convidats encara vius, encuei !
Guiu Rami.
Un banquet très mouvementé.
Les gens se retrouvent volontiers autour d’une table lorsqu’il s’agit de fêter un événement exceptionnel. Il en a été ainsi pour le baptême de notre amie Monique.
Ses grands-parents étaient les fermiers d’une famille bourgeoise grassoise bien connue : la famille Ossola. Ses parents, profitant de toute la place disponible sous un hangar préparèrent un grand repas. Tout avait été nettoyé : les pioches, les houes et toutes les vieilleries qui se trouvent dans une grange ont été cachées par des draps décorés de fleurs qui embaumaient très fort.
Moi, qui étais encore enfant, suis arrivé vers trois heures de l’après-midi, avec mes parents et tous les voisins pour déguster le dessert. Chacun apportait sa chaise. Les convives avaient bien mangé – des raviolis, bien entendu – et bu, en quantité. Quelques-uns avait pris une cuite.
Le grand-père de Monique, Geoffroy, a chanté en piémontais. Il accompagnait ses chansons à l’aide de deux cuillères à café glissées dans le goulot d’une bouteille vide qu’il secouait contre la porte de l’étable située à quelques mètres de la grande table. Et de chanter… Inopinément, Geoffroy s’est mis en tête de sortir la vache pour qu’elle prenne part à la fête. Hélène, sa femme, lui a dit : “Geoffroy, ne fais pas le fou !” Mais, lui, avait déjà ouvert la porte et il a annoncé : “Voici Rosy !” La vache était une brave bête, d’habitude ; mais, quand elle a vu tout ce monde, elle s’est énervée, elle a renversé une table, des assiettes, des verres se sont brisés… un désastre ! Cela a été un sauve-qui-peut général ! Tout le monde a hurlé, s’est mis à l’abri : qui a détalé le plus loin possible, qui a grimpé à une échelle, qui s’est jeté sous les tables…
Enfin, deux ou trois hommes suffisamment robustes ont saisi la vache par les cornes comme s’il s’agissait d’un bœuf, l’ont maîtrisée et ramenée à l’étable.
Ouf ! Quelle histoire. Monique, elle, ne s’en souvient pas, mais son baptême demeure en mémoire de tous les invités, ceux qui sont encore de ce monde, à ce jour !