Se lo siti de l’ieo-06 a pres un pauc de vacanças ben ameritadas, es pas estat ansin ambé la cronica « Nice-Matin » tenguda per l’IEO-06 dins l’edicion grassenca qu’a fach camin. Publicam encuei un autre « RESSON D’AQUI » de l’estiu, un tèxt de Joan Rami : « Un repulsiu biologic ».
Vautres toi sòcis ò amics nos podetz escriure per prepausar lei vòstres tèxts.
Un Repulsiu biologic
Lo mieu grand que ve’n ai ja sovent parlat, laurava, un jorn, una faissa dau costat de Plascassier. Lo cavau, atalat a l’araire, avançava d’un pas egau, lo trabalh si faiá ben. Tot d’un còp, lo cavau si manda en arrier, parte au galòp, ‘mé l’araire que tressautava darrier e va finir dins un boisson de romes dont s’embaranha. « Mai que s’es passat ? si demandèt lo grand. » Metèt gaire de temps per comprene que la bèstia aviá tombat sus un niu de vèspas, pas d’aquelei pichinas que s’installan sota lei taulissas, mai dei gròssas que fan un niu cavat dins la tèrra.
Aquestei son redobtadas dau monde que trabalhan en campanha perqué son, sovent, fort nombrosas e agressivas.
Lei vesins qu’avián tot vist, son arribats en corrent per ajudar a liberar lo cavau de la romeguiera. Diguèron au grand-paire que si porriá pas desbarrassar dei vèspas qu’en vujant sus lo vespier un poaire tirat de la jarra dau comun. Dins la campanha, a l’epòca que lo malhum dei conduchs existiá pas, si bastissián de cabanetas embé un gròssa jarra enterrada ai tres quarts dedins, que serviá de privat. Faliá, de temps en temps, vujar aquesta jarra per mejan d’un trebolaire, una cogorda redona dau lòng còl dont si descopava una dubertura. Un còp levadas lei granas, si metiá la cogorda a si secar e veniá dura coma de bòsc. Era, puei, utilizada coma una gròssa culhiera, lo lòng còl servent de manche.
A nuech facha, quora lei vèspas si son endurmidas, parte lo grand en direccion de la cabaneta, poaire d’una man, trebolaire de l’autra. Puei, va vujar lo sieu poaire dins lo niu e si recampa. E bè ! lo lendeman de matin, li aviá plus ges de vèspas, èran totei partidas e jamai revenguèron. Ansin, si posquèt acabar lo lauratge de la faissa.
Se un jorn siatz embestiats per de vèspas, saupretz ce que fau faire. Lo mai dificil serà pas de trobar un poaire, mai un trebolaire e una cabaneta ‘mé la sieu jarra au dintre.
d’après un racònte de Joan Rami.
Un répulsif biologique.
Mon grand-père, dont je vous ai souvent parlé déjà, labourait, un jour, une planche de terre du côté de Plascassier. Le cheval, attelé à la charrue, avançait d’un pas régulier, le travail se faisait bien. Soudain, le cheval se renvoie en arrière, part au galop, suivi de la charrue bondissante et va terminer sa course dans un buisson de ronces où il s’empêtre. « Que s’est-il donc passé ? s’est demandé mon grand-père. » Il n’a pas mis longtemps à comprendre que l’animal était tombé sur un nid de guêpes, non pas celles qui sont petites et s’installent sous les toitures, mais des grosses qui construisent un nid creusé dans la terre. Ces dernières sont redoutées des gens qui travaillent aux champs, tant elles sont, souvent, fort nombreuses et agressives.
Les voisins, qui avaient tout vu, sont arrivés en courant pour aider à dégager le cheval du gros roncier. Ils ont dit à mon grand-père qu’il ne pourrait se débarrasser des guêpes qu’en versant sur le nid le contenu d’un seau tiré des latrines. Dans la campagne, à cette époque où le réseau d’égouts n’existait pas, l’on construisait des petites cabanes contenant une jarre enterrée aux trois quarts, servant de cabinet d’aisance. Il était nécessaire de vider, de temps en temps, cette jarre au moyen d’une calebasse, une courge ronde au long col dans lequel l’on découpait une ouverture. Après avoir retiré les graines, l’on mettait la courge à sécher et elle devenait dure comme du bois. On s’en servait ensuite comme d’une grande louche, le long col servant de manche.
A la nuit tombée, quand les guêpes se sont endormies, le grand-père se dirige vers la petite cabane, seau d’une main, calebasse de l’autre. Il va ensuite vider son seau dans le nid et rentre à la maison. Eh bien ! le lendemain matin, il n’y avait plus aucune guêpe, elles étaient toutes parties et ne sont jamais revenues. Ainsi a-t-on pu terminer le labour.
Si vous êtes, un jour, ennuyé par des guêpes, vous saurez quoi faire. Le plus difficile ne sera pas de trouver un seau, mais une calebasse et une petite cabane avec sa jarre à l’intérieur.