Se lo siti de l’ieo-06 a pres un pauc de vacanças ben ameritadas, es pas estat ansin ambé la cronica « Nice-Matin » tenguda per l’IEO-06 dins l’edicion grassenca qu’a fach camin. Publicam encuei un autre « RESSON D’AQUI » de l’estiu, un tèxt de Gílbert Mancini : Lo 15 d’avost de 1944.
Vautres toi sòcis ò amics nos podetz escriure per prepausar lei vòstres tèxts.
Lo 15 d’avost de 1944.
« Nancí a lo torticòli », « Lo caçaire es afamat », « Gàbi si va coucar ». Aquelei messatges enigmatics, entre tant d’autres entenduts a la ràdio de Londres que mi fasián rire talament èran comics, anonciavan que lo desbarcament en Provença si debanariá lo 15 d’avost. Aviáu doge ans. La decision de quitar l’ostau qu’abitaviam a Sant-Rafèu fuguèt lèu presa. Vèrs nòu oras de sera, tota la familha s’endralhava sus la rota de Val Escura, mon paire teniá un fanau en man. Camineriam sensa s’arrestar, fins au bòsc de pins pinhons d’ont s’exalava una odor de pegola qu’embaumava. Eriam pròche d’Agai e podiam pas saupre, qu’en fach, lo desbarcament si debanariá a nòstrei pès. En plen mitan dau bòsc, mon paire descurbiguèt un polit agachon qu’èra plus utilizat. Per un temps, aquesta descuberta nos aviá escafat l’ànsia de l’eveniment que viviam.
Sus la miejanuech, lo fuec d’artifici comencèt. N’aviáu agut vist avans la guèrra, mai aquest d’aquí lei passava totei. Petava de tot bòrd e lei balas traçantas esclairavan lo cèu coma de jorn, aviam plus de besonh dau fanau. Leis esparradas dei canons traucavan sensa relambi lo silenci de la nuech. Podèm pas dire qu’avèm agut paur, mai lo pensament de pas saupre coma aquò anava virar, nos carcanhava que non sai. A poncha d’auba, parteriam per un rode, “Lei Caus”, ont i aviá una bastida. Fugueriam ben reçauputs. D’autrei gènts li s’èran acampats e vèrs lei nòu oras de matin, apareissèron lei premiers Americans. Vos dirai pas nòstra gaug. Mi ramenti encara l’enòrma faiolada que l’esposa dau bastidan aviá mitonada dins un vièlh pairòu, negre de la suga e la jòia deis Americans davant aquesta preparacion, tradicionala au sieu. Mi donèron de chocolat a bòudre, de saquetons plens d’una podra que mesclada dins un gòt embé d’aiga donava, coma per magia, d’aranjada, unei lunetas de mica, un calòt, la celèbra biaça càqui e, subretot, un paquetonet de cigaretas que ne’n conteniá pas que tres. Ansin, tubèri ma premiera cigareta ; vos dieu pas ce qu’ai bomit… Fuguèt mon premier contact mé leis Americans. L’endeman torneriam a l’ostau : Sant-Rafèu èra estat liberat lo premier jorn.
Despuei, ai gardat « un pichòt quauqua ren » per lei Johnny, Joe, Sam e Teddy e subretot per totei aquelei que dòrmon sota la tepiera de nòstra tèrra provençala.
Gílbert Mancini.
Le 15 août 1944.
« Nancy a le torticoli », « Le chasseur est affamé », « Gaby va se coucher ». Ces messages énigmatiques, parmi tant d’autres entendus à la radio de Londres, qui me faisaient rire, tellement ils étaient cocasses, annonçaient que le débarquement de Provence aurait lieu le 15 août. J’avais douze ans. La décision de quitter la maison que nous habitions à St Raphaël a été rapidement prise. Vers neuf heures du soir, toute ma famille prenait la route de Valescure, mon père tenait une lanterne à la main. Nous avons marché sans nous arrêter jusqu’au bois de pins parasols d’où s’exhalait une odeur de résine qui embaumait. Nous étions près d’Agay et ne pouvions savoir, qu’en fait, le débarquement se déroulerait à nos pieds. Au beau milieu du bois mon père a découvert une jolie hutte pour chasser à l’affût qui ne servait plus. Pour un instant, cette découverte avait effacé l’anxiété que nous éprouvions devant l’événement que nous vivions.
Vers minuit, le feu d’artifice a commencé. Il m’était arrivé d’en voir, avant la guerre, mais celui-ci les dépassait tous. Cela éclatait de tout côté et les balles traçantes éclairaient le ciel comme en plein jour, nous n’avions plus besoin de lanterne. Les salves des canons trouaient sans relache le silence de la nuit. Nous ne pouvons pas dire avoir eu peur, mais le souci de ne savoir comment tout cela allait finir, nous tracassait énormément. L’aube commençant à poindre, nous sommes partis pour un endroit, « Les Caous », où se trouvait une bastide. Nous avons été bien reçus. D’autres personnes s’y étaient rassemblées et vers neuf heures du matin, sont apparus les premiers Américains. Je ne vous dirai pas la joie que nous avons éprouvée. Je me rappelle encore l’énorme ragoût de haricots que la femme du fermier avait mijoté dans un vieux chaudron, noir de suie et la joie des Américains devant ce plat traditionnel chez eux. Ils m’ont donné du chocolat en quantité, de sachets pleins d’une poudre qui mélangée à de l’eau, dans un verre, donnait, comme par magie, de l’orangeade, une paire de lunettes de mica, un calot, la célèbre musette kaki et, surtout, un tout petit paquet de cigarettes qui n’en contenait que trois. C’est ainsi que j’ai fumé ma première cigarette ; je ne vous dirai pas comme j’ai vomi… Cela a été mon premier contact avec les Américains. Le lendemain nous somme rentrés chez nous : St Raphaël avait été libéré dès le premier jour.
J’ai gardé, depuis, « un petit quelque chose » pour les Johnny, Joe, Sam et Teddy et surtout pour tous ceux qui dorment sous le gazon de notre terre provençale.
Agenda :
Tous les « Ressons d’Aquí » sur le site : http://ieo06.free.fr/