Per de rasons tecnicas, publicam lo Resson tant asperat ambé quauquei jorns de retard.
Nòstre amic, Andrieu responsable de la cronica “Nice-Matin” per l’IEO-06, a decidit de confidar encuei son estilò a Gílbert Mancini sòci de l’ieo-06.
Vautres toi sòcis ò amics nos podetz escriure per prepausar lei vòstres tèxts.
Cu non pesca, non pren pèis.
Coma èran bèlas lei gòrgas de Sianha, au ròde Ponadieu en aquest matin d’auton ! Un temps de calandra emai lo corrent de la ribiera qu’èra quiet. Leis aigas èran tant lindas que si vesiá lo fons coma a travèrs d’un lúpia. Tot semblava plus bèu, plus encolorit. Lei peissons que passavan a flòta, viravan calòta, espaurugats e s’escapavan de tot latz quand s’avisavan que subre d’elei, un parèu d’uelhs li gueiravan. Alora, la tèsta clafida de pantais, Bertomieu se faguèt : “Vuei, es un temps pescador per s’agantar quauquei trochas.”
Cadun saup qu’un Grassenc, quand fai pas la flor, a, mai ò mens, tres passatemps que son la pesca, la caça e lei bòchas. Per Bertomieu, èra la pesca que li agradava e podèm dire que dins lo sieu còr, i aviá totjorn un tremolum que somelhava. Deu saupre tanben que la trocha fai quasiment de sus plaça entre mitan de l’aiga per empassar lei moscas aigassieras que virolejan au risent de l’aiga. Tanben, Bertomieu s’arnesquèt embé tot lo sieu atiralh de pesca : lència, musclaus, salabre, escas, sensa oblidar lo tua-vèrme botat dins lo panier barradis. E ve l’aquí partit long de dralhas escalabrosas per fin de jónher Ponadieu. Sabètz aquela estirada s’ameritava, mai que chale de caminar au mitan dei boissieras e dei pins gavòts. Pas una ròca, pas una lòna fuguèron paupadas…
M’una paciéncia d’ange mandava arderosament sa lència au fons de l’aiga. Manda e remanda ; s’en vai, s’en vèn ; passeja la sieu lència davant cada trauc de ròca, un còp a drecha, un còp a senèstra per tirassar l’esca a sauton. Temps en temps s’embranca a la ròca e Bertomieu deu tirar plus fòrt per la destacar. Mai aquest còp li semblava de remontar quauqua ren d’autre. “Aquò deu èstre una escarpa per tiblar lo fieu ansin. Es clar, se faguèt Bertomieu qu’es pas una anguielassa que fai la mòla.” Tot a sei pensaments, Bertomieu veguèt montar, au bot de la sieu lència, quauqua ren de mostrós e lusent. (seguirà)
Gílbert Mancini.
On n’a rien, sans rien.
Qu’elles étaient belles les gorges de la Siagne du côté de Ponadieu, ce matin d’automne ! Un temps charmant et le cours de la rivière calme. Les eaux étaient si claires que l’on voyait le fond comme au travers d’une loupe. Tout semblait plus beau, plus coloré. Les poissons qui passaient par bancs, s’affolaient, épouvantés et s’échappaient de tous côtés lorsqu’ils s’apercevaient qu’au-dessus d’eux, une paire d’yeux les guettaient. Alors, la tête pleine de rêves, Barthélémy s’est dit : “Aujourd’hui le temps est favorable pour attraper quelques truites.”
Chacun sait qu’un Grassois, quand il ne cultive pas la fleur, à, en gros, trois passetemps la pêche, la chasse et les boules. Pour Barthélémy, c’était la pêche qu’il aimait et l’on peut dire que, dans son cœur, il y avait toujours un petit frisson en sommeil. Il sait aussi que la truite demeure quasiment sur place entre deux eaux pour avaler les mouches aquatiques qui voltigent à fleur d’eau. Aussi, Barthélémy s’est-il équipé de tout son attirail de pêche : ligne, hameçons, épuisette, esches, sans oublier le casse-croûte fourré dans le panier à couvercle. Et le voici parti le long de sentier à pic au milieu des buissaies et de pins sylvestres. Pas un rocher, pas un trou d’eau ne fut épargné…
Avec une patience d’ange, il lançait avec ardeur sa ligne au fond. Il l’envoie, la renvoie ; elle va, vient ; il la promène devant chaque trou de rocher, tantôt à droite, tantôt à gauche pour tirer l’esche par petits bonds. De temps à autre, elle s’accroche au rocher et Barthélémy doit tirer plus fort pour la décrocher. Mais, cette fois, il lui semblait remonter quelque chose d’autre. “Ce doit être une carpe pour tendre le fil ainsi. Il est clair, s’est dit Barthélémy, qu’il ne s’agit pas d’une grosse anguille qui résiste de tout son poids.” Perdu dans ses pensées, Barthélémy a vu monter, accroché à sa ligne, quelque chose de monstrueux et de brillant. (à suivre)