Amics occitans, la cronica Ribon-Ribanha d’ancuei, titrada “Lo mieu Carneval”, v’es prepauada da Simona Colomas,sòcia de l’IEO-06.
Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
“La garderem ribon-ribanha, nòsta rebèla lenga d’Òc !”
LO MIEU CARNEVAL
N’ai vuech sus l’esquina. Siáu carriera Cassini. Embé la mieu pichina vesina siam caladi en carriera per asperar Carneval. L’istòria es totjorn pariera : lu policiers arrestan la circulation e lo cap dau trambalan arriba miejora avant, mé lu sieus otís e la sieua granda escala per levar lu fius dau tram e laissar passar lu carres.
Lu pichoi dau canton son toi aquí e asperan. Avant tot lo monde avèm la jòia de poder veire aquelu carres importants e gigants per li pichinas filhetas que siam.
Avèm ja lu confetis, nòstri maires an fach li crompas dins la matinada a Niceco plaça Galibardi.
Lu carres si veon de luenh. Es ben bèu : lo rei, la regina, la ratapinhata et sobretot lo carre de la poliça mé un gròs commissari vestit en frema embé barba et totplen de pels ai cambas, de gròssi possas, una perruca blonda, e un bambin de plastic en lu braç. Lo nos manda sus la tèsta emb’ una còrda. Li èra finda un palhasso que si fa sautar en l’ària.
Cantam, s’amusam en la carriera, es ben plus bèu qu’en plaça Massena.
Mas passa lèu. La nuech arriba.
Fa frei. Fa totjorn frei per Carneval. Nòstri pichinas cambetas meme mé caucetas de lana fins ai ginolhs son geladi.
Es ben daumatge… tornerem la setmana que ven.
Avèm vuech ans e siam en lo mile nòu cent sessanta.
Ancuei lo plaser d’aqueu jorn es l’arribada de Carneval
Deman farem li gansas e pi serà Pascas, l’estiu, Calènas e réplica ;
Li annadas son passadi mas a cada Carneval, mi ven en ment la mieu carriera, lo sieu trambalan mé lo sieu cap que eu, solet, avia lo poder de faire passar CARNEVAL.
Simone COLOMAS
