Segond atalier de coïna de l’IEO-06
Lo segond atalier de coïna bailejat da Crestian DESRUMEAUX si debanèt dissabta 8 de novembre.
Un grop de 8 sòcis si recampèt a l’Escarea per emparar la preparacion dei Barbajoans de Gòrb e de bescuechs au mèu e ai mortèlas.
L’atalier comencèt per la preparacion de la pasta dei barbajoans, per la poder laissar pauar un pauc. Pi èra temps d’alestir li bleas, lo jivert e l’alhet per l’emplum dei barbajoans.
Lavar, talhar, esquichar, cadun èra au travalh, embé un pauc de música difusada dau temps de l’atalier (música dau gròp Du Bartàs que va venir jugar lo 22 de novembre a Niça).
Un còp la pasta e lo farçum dei barbajoans alestits, lo gròp si mètet a la preparacion dei bescuechs au mèu e ai mortèlas.
Puei venguèt lo temps de preparar lu barbajoans. Après una demostracion dau mèstre, tot lo gròp si mètet a l’òbra.
Per poder tastar, una partida dei barbajoans e dei bescuechs siguèron cuechs en fin d’atalier.
Per lu bescuechs, pas lo temps de pilhar una fotò, la mitan avia ja despareissut… accompanhats de bevandas regaladi da Florença, qu’avia aculhit aquest atalier au sieu.
Coma lo còup passat cadun s’empartèt au sieu emb’ai sieus plats.
Vos donerem li recetas d’aquí gaire.
Alexandra