Après 20 setmana de cors intensius sus Zoom, es estat decidat de si retrovar dau temps dei vacanças alentorn d’un aperitiu virtual e de contar basta lo “Que de nòu ?” e d’escambiar de maniera naturala. Una mena de “Cafè Occitan” qué !
Vos presentam lu tèxtes que nos son estats mandats.
10 personas participèron a l’aperitiu virtual : Crestian, JPB, Crestiana, Robèrt, Gerald e Choaseta, Marie-Do e Rogier, Rogier G, Jouseta.
Qué de nòu ?
Robèrt PITTIN :
Dijòus 18 de febrier, après aver viatjat set mes a travèrs l’espaci e aver percorrut 497 milions de quilomètres , « Perseverance » es arribat sobre la planeta roja.
Una escomessa extraordinària per l’intelligença umana tenguda per lu scientifics dau monde entier qu’an travalhat sobre aquel projèct.
Aquela reussida es lo començament d’una lònga aventura en lo domeni de la conquista espaciala.
Alora, m’anatz dire « qu’avèm da besonh d’anar sobre Març.
Mi sembla que l’òme a totjorn augut besonh d’acapir lu mistèris de l’univèrs per domesticar lo sieu environament que sigue pròch ò aluenhat.
L’òme a finda totjorn augut besonh d’aventuras e de conquistas per existre en tant qu’òme.
Despí qu’es vengut bipède, a jamai arrestat de córrer lo monde a la descurberta de novèus territòris.
La tèrra es vito venguda tròup pichina per eu, aqueu besonh visceral d’anar totjorn plus luenh, l’a menat a si pantaiar l’impossible.
E l’impossible es vengut dau domeni dau possible.
Un pen pauat sus la surfaça de la luna e lo camin de la conquista d’autri planetas èra dubert.
L’arribada d’aqueu objèct identificat sus Març es sensa dubi lo principi de la conquista extraterrèstra dei terrians e revela li capacitats extraordinari de l’òme.
JPB : Diménegue 21 de febrier aneriam faire una passejada a fòrt de la ROVERE. Es pas lo premier còup que fèm aquesta passejada que dona una vista de la còsta meravilhoa de Sant Joan Cau Ferrat en particular e mai luenh encara. Dau fòrt partem vèrs lo levant, costat Turbia, fins au mont Forna. Lo temps èra bèu e bofava un vent a desbanar li cabras e autri bèstias banarudi. Sus lo retorn pròche la taula d’orientacion fagueriam lo rescòntre d’un pòrc fèr que si penecava au soleu. Augueriam temps de li faire una fòto e d’avisar de la sieu presença mai d’una persona que passèt pròche d’eu. Es lo premier còup que mi siguèt donat de veire de tant pròche dins lo mitan natural aquesta bèstia.
Jouseta : D’amics nos an portat d’aranges amaras, de portegals amars coma o diètz. Alora, coma cada an, mi siáu mesa a alestir de vin d’arange. Aviáu lo sucre, la vanilha, leis clavèus de giròfle ; siáu anada crompar lo vin rosat. Mi mancava plus que l’alcòl. Avans lo ( la ! ) covid 19, li aviá totjorn quauqu’un de la familha ò un amic qu’anava a Vintimilha per radurre d’alcòl per eu e per sei conneissenças. Coma si pòu plus faire, fau si resòuvre a metre d’alcòl a frucha mai alora n’en fau lo doble. Es cen qu’ai fach.
A l’ora d’ara, toei leis ingredients son dins la bombona ( ò damajana) a macerar durant 40 jorns au minimom e meme si l’oblidam ne’n sera que melhor. Après, resta a lo filtrar e a lo metre en botilhas mai aquò es lo trabalh de Gílbert, mon òme, que fau ben que participe si vòu se ne’n regalar !
Choaseta e Gerald CLEMENT : Siam estats vaccinats per lo segond vaccin Pfizer. Aquesta fes, l’i avia totplen de monde a faire la coa defòra lo lòng dei jardins,
l’i avia de gents per lo premier vaccin e d’autres per lo segond. Eravam mai ò mens una centena.
Gerald es estat vacinat dissabta e a totplen ben suportat lo vaccin. Ai pas vist lo ministre de la santat, èra ja partit !
Siáu estada lassa doi jorns, aüra va ben.
