Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, aquesta cronica comencèt, li a mai de quatòrze ans, lo 8 de junh de 1997. Òsca !
Chronique pour ce samedi 25 juin 2011 en lenga nòsta.
Sant Prospèr
Per l’Agachaire
Es encuei l’anniversari (e adonc pereu lo jorn de sa fèsta) de la mòrt d’un sant dau sègle V, que li diam encara Prospèr l’Aquitan, d’abòrd que naisset dins aqueste païs.
N’i a que ne’n fan pereu lo promier avesque de Riès, mai d’aquò ne’n sabèm tròp ren. Siam pasmens segurs de sei rapòrts ambé Provença, estent qu’èra a Marselha en 428.
Es conoissut promier coma poèta (ce que ne’n fai lo sant patron dau monde que o es tanben : una causa gaire sachuda). Correspondiá en vèrs ambé sa jove frema, e sembla qu’aquò aguèsse facilitat la patz de son pareu. Aqueles qu’an de problèmas amb aquò pòdon totjorn assajar aquela solucion, emai se fau, e qu’an pron d’inspiracion, sus son telefonet ò per SMS (sensa oblidar, en un bòn besonh, d’invocar lo sant aquò fasent…)
Aparaire de sant Augustin, anet jusqu’a metre un resumit de sa doctrina en 1002 examètres ! Ce que mòstra ben que l’òm pòt poetisar sus totei lei subjècts, tant sagrats coma profanes…
Coma, adonc, èra un escrivan de tria, venguet secretari dau papa sant Leon lo Grand. Vesètz ben que la poesia pòt menar a tot, e favorisar jusqu’à a la santetat ! Coma d’alhors son nom o disiá dejà, anonciaire de prosperitat…