Vaquí la cronica setmanièra de l’Agachaire d’aquest diménegue (dimenge) dins “La Provence”, edicion deis Aups. Per informacion, aquesta cronica comencèt, l’i a mai de vint e sèt ans, lo 8 de junh de 1997. Òsca ! Cronica dau 12 de genoier de 2025 en lenga nòsta per l’Agachaire
Istòria de ma Crècha (5)
Un còp montadas lei muralhas des ostaus, per les teulissas,
cerqueriam pas lòngtemps : de carton ondulat, pintat de roge,
faguet de tieras de teules perfiechas.
Ara, podriáu pas dire dins quunt òrdre tot aquò fuguet edificat, ni
quand tot s’acabet. Adonc, ne’n parlarai un pauc a l’asard.
Pasmens, me sembla que lo potz fuguet dins les promiers. Se pòt
comprendre : beure es un besonh essenciau… Mai estent que les
potz son redons, pas question de ne’n faire un en còntra-placat ! Es
una pichòta boita de Nescafè que faguet l’afaire, un còp apondut un
relaisset de carton, e tres canèus per l’i pausar dessús una teulissa
lònga.
Per posquer posar l’aiga, fuguet un autre afaire. Mon paire prenguer
un tap de siure pas tròp gròs, de quauque botelhon de sabo plus de
qué, e lo cavet per ne’n faire un ferrat. Seriá de tot segur estat pus
complicat de faire un poaire, emai fuguèsso pas segur que mon
paire aguèsse fach la diferéncia : deviá pas sovent aguer posat
d’aiga a un potz. Un pichòt fieu d’aram faguet la manelha, et una
lesca d’un autre pichon tap fuguet talhat per faire la carrèla. Ferrat e
carrèla fuguèron daurats, e una pichòta cadena, passada sus la
carrèla, permetiá (e permete encara) de posar l’aiga imaginària,
bevenda costumiera dei santons. Mai aquela cadeneta, me
demando totjorn ont aviá poscut la trobar…
(De seguir)
Jean Yves ROYER
