Cars amics e sòcis,
Un pareu de mes fa, lo President de l’IEO-06 Joan-Pèire Baquié e nautres, combrícola de la seccion niçarda dicha « Lo Gramon », augueriam l’idea de crear una cronica en lenga setmaniera que pareisseria sus lo site nòstre (http://ieo06.free.fr/) cada dimècres e vendria sonada Ribon-Ribanha.
La tòca èra dobla : permetre en cadun emb’au sieu gaubi de compòrre de pichins tèxtos sus d’un subjèct que l’interessa e prepauar de lecturas simpli emb’una revirada ai escolans de l’associacion. Au jorn d’aüra, avèm ja publicat un dezenau de cronicas e n’avèm autant en aspera per li pròssimi setmanas.
Mas en defòra d’una poesia en occitan dei valadas d’Itàlia, toi son d’escrichs en niçard. Seriam pròpi urós de poder ofrir tanben ai lectors de tèxtos en provençau, en aupenc ò d’autri variantas de l’occitan per fin de li faire descurbir tota la riquessa de la lenga nostrala e un molon d’autors d’origina, atge e orizonts diferents.
Vequí perqué veni ancuei vos prepauar de partecipar en aquesta aventura. Degun besonh d’èstre una somitat de cultura ò leteratura, basta nos contar li istòrias que vos venon en ment, lu pensiers que l’actualitat v’inspira ò simplament lo vòstre quotidian.
Siam en cerca de pichins tèxtos de 10-15 regas ò mai embé revirada e, perqué non, una fòto d’illustracion. M’augurant que seretz de centenaus a respòndre a la nòstra chamada, vos laissi l’adreça postala dau Gramon : IEO 06 – Lo Gramon, 192 rota de Turin, 06300 Niça
e l’adreça electronica :
Per autre, se siatz desirós de reçaupre regularament la cronica Ribon-Ribanha, podètz nos comunicar la vòstra adreça electronica.
(Per memòria, aquest article passèt sus AGORA-CREO grope e foguèt mandat tanben ai sòcis de l’IEO de la region per lo CREO-Provença.)
Amistats en toi, m’esperi de vos legir pron lèu.
Aquí sota troveretz lu liames vèrs li cronicas pareissudi :
Anna-Maria Milardi : (02/11/2008) « Presentacion de la cronica Ribon-Ribanha »
Anna-Maria Milardi : (05/11/2008) « Viatge en país catar »
Evelina Maiolino : (12/11/2008) « Impressions de viatge »
Verònica Milardi : (19/11/2008)« Pantais irlandés »
Giacomo Genti : (26/11/2008) « Sumi »
Joan-Pèire Baquié : (03/12/2008) « A prepaus de menchonada »
DLM : (10/12/2008)« Lo Garatgista »
Viviana Nervo : (17/12/2008) « Colissas dau cachafuèc »
Annia Laligant : (24/12/2008) « Lo sap de Calènas »
Autor anonime : (31/12/2008) « La Dinda au Bordèu »
Raimond Vacquier : (7/1/2009) « Minga rua »