Convidats per lo CEP d’ÒC a la mediatèca dau COLOC, a s’Ais de Provença, Sébastien Cagnoli e Miquèl de Carabatta presentèron lu sieus darniers obratges.
Lo premier “Quora despareissèron lu colombs” es una traduccion occitana (niçarda) dau libre de Sofi Oksanen presentat per lo premier còup a Niça lo 2 de mai dau 2013. Una traduccion directa dau finés a l’occitan, que devem a Sébastien Cagnoli e Miquèl de Carabatta. Totplen d’articles siguèron consacrats en aquest obratge sus lo site de l’IEO-06. Lu porretz retrovar aquí : http://ieo06.free.fr/spip.php?article2482
Lo segond “Lo barròco funeral de paure Mèstre Simon-Pèire Sartre” es lo premier libre de Miquèl de Carabatta, espelit en setembre dau 2014. Au dintre set novèlas, la premiera que donèt lo titre au libre, obtenguèt un premier premi au concors literari dei “Amics de Mesclum”. Una autra dei sieu nòvèlas, “Lo fantasma de l’aparecida“, servèt de supòrt a la dictada occitana dau 2015. La podetz escotar aquí. De l’avís de totplen, Miquèl de Carabatta es un autor que, d’aüra en avant, va comptar en lo païsatge literari contemporan occitan.
Joan-Pèire Belmon, president dau CEP d’ÒC, presentèt pi un tròç dau sieu filme “La guèrra denembrada” embé d’intervistas de gents de “Ribassiera”.
La premsa regionala èra presenta embé lu messadiers “Aquò d’Aquí” (Michèu Neumuller) e “Prouvenço d’Aro” (Tricio Dupuy) .
Joan-Pèire Baquié rapresentava lu editors IEO-PACA e IEO-06.
Da signalar tra autre, dins la sala, la presença dau conselhier regional Hervé Guerrera, aquela de Magalí Bizot-Dargent que faguèt l’entamenada dau libre de Miquèl de Carabatta e de Joan Saubrement autor dau libre “D’una Guèrra l’autra” e futur convidat dau CEP d’ÒC.
Intervista de Miquel de Carabatta : https://www.youtube.com/watch?v=334Kh4J8X9k#t=23
voir vidéos sur le site http://www.cepd-oc.fr/
crédits photos : Michèu Neumuller et Joan-Pèire Belmon